| Биз, окъуучуланы тилеклери бла, къарачайда, Малкъарда джюрюген, сабий бёлегенде, келин келгенде айтылыучу алгъышладан басмалайбыз. Огъурлу бешикге бёлейим,
Бешикден сау чыгъыб кёрейикм.
Бешик бауунг бек болсун,
Джашау кюнюнг кёб болсун,
Сени сюйген кёб болсун,
Сени сюймеген сёл болсун,
Келинле келсинле юйюбюзге,
Къызлы чыкъсынла юйюбюзден,
Миннген атынг джоргъа болсун,
Аты атлада алда барсын,
Сермегенде алчы болгъун,
Ишлегенде башчы болгъун!
Атхан огъунг аджашмасын,
Кютген малынг ауушмасын,
Джанынг болсун Аллахха аманат,
Кесинг болгъун, сейир, аламат!
Аламат болгъун, танг болгъун,
Аллах сюйген джан болгъун,
Сау къутулгъун бешикден,
Къууана къайтхын эшикден! *** Аллах сакъласын бу сабийни ауруудан,
Ажымлы аджал джар къарнына элтмесин,
Джаш джанына зарауатлыкъ* джетмесин,
Сау къутулсун бу сабийчик бешикден,
къууанч эте, ойнай кирсин эшикден,
Отоууна къара къаш келин келтирсин,
Аллах мынга алгъышланы джетдирсин,
Олтурур джери тёр болсун,
Къыйын джоллары ёр болсун*,
Отда-ёртенде кюймесин,
Киши чепкенин киймесин,
Ауруу-талау табмасын,
Киши къама такъмасын,
аягъы ташха тиймесин,
Аанасын мыдах этмесин!..
*Зарауатлыкъ - къыйынлыкъ.
*Ёр болсун - ёрге элтген, къууанчлы джол болсун.
| 
